Sétima edición do Torneo Volei Praia Concello de Carballo

1891391_249184738626170_5690818218940706354_oAs catro pistas da Explanada de Razo acollen o domingo 10 de agosto a partir das 11.00 horas a celebración da sétima edición do VII Torneo-Foliada de Volei Praia Concello de Carballo. A organización, que mantén a inscrición aberta até o venres 8 de agosto a última hora, espera que se supere a participación do ano pasado, cifrada en 148 xogadores e xogadoras. Rosalino Mariño, da Asociación de Volei Praia Costa da Morte, subliña que a actividade das Escolas de Volei Praia ten sido moi elevada no que vai de verán, xa que «moita xente vai única e exclusivamente á Explanada para xogar ao volei», o que tamén contribúe ao éxito do torneo. Respecto das modalidades da cita son Super80, Sénior, Sub15 e Supermini en categorías masculina, feminina e mixta e Mariño asegura que estarán presentes «as mellores parellas de Galicia», chegadas moitas da Coruña, pero tamén de Pontevedra e, por suposto, de Carballo. A actividade deportiva compleméntase coa degustación dunha paella para 100 persoas, o reparto de bolos preñados por cortesía de Panadería Roiser e con actividades lúdicas como tiro da corda, lanzamento de globos de auga ou lanzamento de pedras, xogos que reforzan o carácter familiar do torneo. Os interesad@s en anotarse poden aínda obter máis info en Facebook ou formalizar a inscrición no enderezo electrónico <ros25volei@yahoo.es> ou no teléfono 606 400 858.

Rosalino Mariño espera que, como en anos anteriores toda a actividade de volei praia desenvolvida na Esplanada contribúa a crear afeccionados e a que «a xente continúe practicando este deporte en pista» durante o inverno a través dos equipos do Volei Xiria. O Concelleiro de Deporte, Marcos Trigo, quixo resaltar que «un ano máis o volei en Razo é un éxito» coas pistas cheas case cada día. Para Trigo, isto amosa que «Razo é unha praia viva á que tamén se vai a gozar do deporte», e xa «non só polo surf, senón tamén co volei» coa presenza de «xente incluso de fóra de Galicia» no torneo. O concelleiro quixo tamén salientar o carácter familiar do torneo «moi acolledor» creando un día que adoita a ser «emotivo e bonito». Está previsto que o torneo dure aproximadamente ata as 20.00 horas. Os interesados e interesadas poden descargar o cartel anunciador das citas de volei do verán en pdf mesta mesma nova.