O pasado sábado a parella de Xiria Volei formada por Christian e Christopher Pallas Lorenzo, acadaban un gran 4º posto no seu debut nesta nova tempada de voleipraia ca súa participación na segunda proba do Circuito Galego de Voleipraia, puntuable para o Ranking Nacional de Voleipraia.
Os irmáns Pallas Lorenzo acudían á cita do Torneo Cidade de Ourense coma primeira toma de contacto desta tempada de voleipraia, e sen pisar a area mais que un día, un par de horas. Sen adestrar, chegaban á cita en Ourense situándose na lista de entrada do torneo na posción número 13, nun cadro con parellas moi solventes formadas por xogadores e ex-xogadores de Superliga e Superliga 2 na modalidade de volei pista e con xente moi experimentada no voleipraia que levan xa un mes adestrando.
Madrugón para chegar a xogar o primeiro encontro ás 9:30 h, no que se desfacían en dous sets dos quintos cabezas de serie do torneo Soto-Cid do Club Ourense Voleipraia, dando a primeira sorpresa. Esta victoria servía para continuar o torneo polo cadro de gañadores, pero no seguinte encontro esta situación cambiou ó caer ante os xogadores do Barraña Voleipraia Vázquez-Romero (14ª cabezas de serie). Os carballeses comezaron moi desconectados o encontro cedendo o primeiro set e a reación non foi suficiente para darlle a volta ao encontro no segundo set.
Neste intre, e xa no cadro de perdedores, a parella de Xiria Volei sabía que unha derrota significaba o final do torneo para eles. Encontro tras encontro foron gañando a 1ª, 2ª e 3ª respesca deixando no camiño aos 7º, 12º e 3º cabezas de serie do torneo respectivamente, e obtendo o billete para as semifinais.
Nas semifinais esperábanlles os primeiros cabezas de serie do torneo Palharini – Gómez do Voleipraia Vigo, que viñan de xogar o venres a previa dos Internacionais Cidade das Rozas en Madrid, primeira proba do Circuito Madison Beach Tour 2016. Un encontro no que a parella olívica non deu opcións aos carballeses vencendo con claridade por 2-0.
Dende as 9:30 h que xogaron o primeiro encontro, os participantes pasaron por frío, calor, vento, calma, choiva, luz natural, luz artificial… Ás 00:30 h que comezou a pelexa polo bronce as forzas e o físico dos xogadores non daban para mais, e os carballeses chegaban ao último encontro con serios problemas musculares que xa fixeran acto de presenza nas semifinais. Durante o encontro, e co frío da noite encima, os irmáns Pallas Lorenzo tiveron que tomar a decisión de retirarse xa que os problemas musculares ían a mais, e preferiron non forzar a máquina e evitar unha lesión de maior gravidade.
O cadro de honra do torneo quedou da seguinte maneira: 1º Álvarez – Losada (Voleipraia Vigo), 2º Palharini – Gómez (Voleipraia Vigo), 3º Vázquez – Romero (Barraña Voleipraia) e 4º Pallas – Pallas (Xiria Volei).
Parabéns a Christian e a Christopher pola súa gran actuación, que sabemos que non será a última, e queda todo o verán por diante para que nos dean moitas alegrías.
Esta semana o Circuito Galego de Voleipraia ten a súa parada na Cidade de Lugo, e aínda non se sabe se haberá representación de Xiria Volei, xa que Christopher non pode xogar esta semana e Christian está na procura dunha parella para acudir a cita de Lugo.
